O programa iníciase coa implantación de sete puntos de recollida: rexistro do Palacio de María Pita, sede da Concellería de Medio Ambiente na rúa Real, sede da Concellería de Urbanismo, departamento de Informática do Concello, Fórum Metropolitano, Casa Paredes e Centro Cívico de Monte Alto. Nestes lugares de recollida instalarase tamén unha máquina de destrución de datos co fin de que, unha vez depositados no colector de reciclaxe, ninguén poida acceder á información dos soportes. Deste xeito, garántese o cumprimento da lexislación vixente en materia de tratamento e protección de datos antes de que o material pase á fase final de reciclaxe.

O Concello conta coa colaboración da empresa Sarbide para realizar esta iniciativa, que potencia a reciclaxe e reutilización do policarbonato, matriz plástica principal constituínte destes produtos, permitindo así cerrar o seu ciclo de vida. Os compoñentes dos soportes ópticos son unha boa materia prima para outros usos industriais, xa que con eles pódense fabricar carcasas de ordenadores e teléfonos, tulipas de farois, faros de vehículos, manillas, salpicaderos de coches, entre outros.

A implantación deste sistema de xestión pretende implicar a cidadanía no desenvolvemento de actitudes medioambientais positivas. Neste caso non se trata dun residuo tóxico nin perigoso senón que é considerado como residuo inerte. Non obstante, os efectos negativos no medio ambiente son causados polo desaproveitamento dunha materia prima potencialmente reciclable. Con esta iniciativa, o Concello continúa coa súa política de protección do medio ambiente iniciada no ano 1999 e ratificada polo goberno local coa adhesión á Carta de Aalborg, unha declaración das cidades europeas a favor da sostenibilidade.