En todo o mundo usa a auga para beber, cociñar e lavar, pero utilízase mesmo máis auga para a produción de bens como alimentos, papel ou algodón. A pegada hídrica é un indicador do uso de auga, tanto directo como indirecto, dun consumidor ou produtor.

Segundo Hoekstra e Hung, a pegada hídrica defínese como o volume total de auga doce usada para producir os bens e servizos producidos por unha empresa, ou consumidos por un individuo ou comunidade. A metodoloxía de cálculo da pegada hídrica clasifica a auga en tres categorías: auga azul, auga verde e auga gris. Así distínguese entre a auga auga doce superficial e de acuíferos (auga azul), a auga vinculada á precipitación e o seu almacenamento en forma de humidade do chan (auga verde) e o fluxo de auga contaminada ou auga necesaria para diluír os contaminantes ata manter un equilibrio ecolóxico (auga gris).

Así como ao tratar a pegada de carbono considérase a posibilidade de compensar as emisións entre diferentes áreas xeográficas polo carácter global dos efectos dos GEIs, non se pode facer o mesmo coa pegada hídrica. Isto débese a que os efectos, perniciosos ou positivos, da xestión da auga están restrinxidos á contorna local e, polo tanto, non cabe a posibilidade de compensar os consumos de auga entre rexións remotas.

Con todo o comercio internacional de bens intensivos en consumo de auga xera incrementos de consumo de auga no país produtor e reducións no país comprador. Este fenómeno coñécese como fluxo virtual de auga internacional.

Como consumidor pódese reducir a pegada hídrica directa instalando perlizadores nas billas, utilizando ciclos “eco” en lavadoras e lavalouzas, facendo descargas parciais da cisterna, etc.
A pegada hídrica indirecta (o consumo de auga vinculada aos bens adquiridos) é moito maior que a pegada directa e pode reducirse substituíndo os produtos máis intensivos en consumo de auga por alternativas máis eficientes dende o punto de vista hídrico. Sería moi interesante dispoñer de información sobre a pegada hídrica na etiquetaxe do produto para poder tomar decisións sobre a súa compra.

Algunhas cifras de pegada hídrica

• 1 kg de carne de tenreira: 13.620 l
• 1 kg de carne de porco: 4.364 l
• 1 kg de carne de pito: 3.546 l
• 1 l de cervexa: 686 l
• 1 kg de patacas: 900 l
• 1 kg de arroz: 3.400 l
• 1 kg de chocolate: 24.000 l
• 1 kg de azucre: 1.500 l

Máis información:

http://environment.nationalgeographic.com/environment/freshwater/embedded-water/
http://www.waterfootprint.org