Ermitas Valencia explicou que o Concello facilitará a información e a inscrición no voluntariado a través do Centro de Información Xuvenil situado no Fórum Metropolitano. Os interesados poderán dirixirse alí para recadar os datos necesarios ou formalizar a súa inscrición no servizo. Ademais, teñen á súa disposición o teléfono gratuíto 900 400 800.

Valencia argumentou que dende a concellería "estamos moi interesados en promover o voluntariado do monte galego, coa finalidade de achegar á xente do contorno urbano a problemática do rural. Trátase de realizar un traballo de sensibilización e respecto, derivado da necesidade de protexer o medio natural".

Ademais de potenciar dende o Concello a participación no voluntariado, Ermitas Valencia anunciou que en agosto organizaranse grupos de voluntarios para vixiar o contorno periurbano da Coruña. Estes grupos, de entre 20 e 25 persoas, estarán coordinados por Adega (Asociación de Defensa Ecolóxica Galega), que facilitará a información e a formación necesaria aos voluntarios para realizar o seu labor. A edil de Xuventude engadiu que o obxectivo é aumentar as actuacións do servizo na Coruña. Agora incluso, o voluntariado do monte galego conta con 560 inscritos na cidade, 2.000 na provincia e máis de 6.500 en total. 

O director xeral de Xuventude, Rubén Cela, agradeceu a colaboración do Concello xa que, segundo asegurou, "a pesar de que a xestión estea centralizada, é moi importante contar coa participación activa das institucións locais, con centros de información específicos nelas". Así mesmo indicou que "este é un voluntariado de calidade, no que as persoas que participan non corren riscos, nin realizan un traballo substitutivo dos servizos profesionais de vixilancia e extinción". Cela tamén apuntou que se trata de ofrecer un servizo de voluntariado próximo ás casas, no que os voluntarios poidan participar en grupos de vixilancia dentro da súa comarca.