Concello da Coruña

Concello da Coruña

Cando:

5 de novembro de 2021

O Concello da Coruña retoma as visitas nocturnas teatralizadas ao cemiterio de San Amaro

O actor e guía turístico Suso Martínez volverá dar vida á personaxe de Fiz de Cotovelo nesta actividade da Concellaría de Medio Ambiente

O Concello da Coruña retoma as visitas nocturnas ao cemiterio de San Amaro. O actor e guía turístico Suso Martínez volverá interpretar a Fiz de Cotovelo, unha das célebres personaxes de Wenceslao Fernández Flórez en 'O Bosque Animado', para amosar aos visitantes a infinidade de segredos que garda este xenuíno espazo da cidade.

Esta mañá presentáronse estas novas sesións no propio cemiterio. Estivo presente a concelleira de Medio Ambiente, Esther Fontán, responsable da área que organiza estas rutas teatralizadas. "Isto é moito máis que un cemiterio. É historia viva da cidade e da cultura da Coruña. Por iso é rechamante e recomendable coñecelo nun ámbito teatralizado como este", sinalou a concelleira.

Suso Martínez, pola súa banda, realizou un pequeno adianto do contido destas xornadas en San Amaro, que estiveron paralizadas por mor da pandemia e retoman agora a normalidade. Estas rutas levan celebrándose desde o ano 2012, bicentenario do cemiterio, e permiten á cidadanía e aos visitantes coñecer máis en profundidade espazos destacados deste lugar tan especial. "Fiz de Cotovelo será unha vez máis o guía destas visitas. Un personaxe marabilloso de Fernández Flórez. Penso que vai levar á xente a vivir cada recuncho deste cemiterio", indicou Esther Fontán.

A ruta teatralizada por San Amaro foi desde os seus inicios a que máis éxito acadou das desenvoltas no Concello da Coruña e a máis demandada do conxunto do país ata o comezo da pandemia, indocou Martínez. Suso Martínez ponse na pel de Fiz de Cotovelo, unha ánima en pena, guía da Santa Compaña, que será o mestre de cerimonias que descubrirá todos os recunchos e as historias que agocha un dos cemiterios máis antigos de Europa. "Este é un cemiterio único. O cemiterio atlántico de referencia", indicou Suso Martínez. Esta ruta é unha homenaxe aos mortos e ás figuras máis destacadas da Coruña e Galicia de distintas épocas. "Estou moi feliz de recuperar esta visita. Somos pioneiros neste tipo de rutas teatralizadas e está claro que esta é especial. Temos un ambiente máxico en San Amaro", indicou Suso Martínez.

As visitas guiadas ao cemiterio de San Amaro comezan este mesmo sábado. Serán os sábados 6, 13, 20 e 27 de novembro e 4, 11 e 18 de decembro, en horario de 20.00 a 21.30 horas. A actividade estará limitada a 20 persoas por grupo, que deberán inscribirse, achegando datos persoais, na plataforma habilitada polo Concello da Coruña. A concelleira Esther Fontán indicou que esta actividade podería continuar nos seguintes meses en función do seu desenvolvemento actual.

Enerxía sostible

Que che parece esta sección?

-101-101-101

Síguenos en

Tes un navegador demasiado antigo!

Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible

Iniciar sesión