O Concello da Coruña iniciará a vindeira semana os traballos de mellora da área canina do parque de Santa Margarida, que levará aparellada a creación dunha nova entrada ao parque na rúa de San Mateo. O obxectivo do Goberno de Inés Rey con esta actuación é proporcionarlles ás persoas usuarias deste espazo unha serie de melloras para fomentar o seu uso.

A actuación comprende a reestruturación do espazo para facelo máis accesible e que o seu acceso poida facerse desde San Mateo. Para iso, incorporóuselle ao parque unha superficie na cara norte deste espazo e á área canina outra superficie na cara sur.

Ademais, instalarase un novo pavimento de empedrado nunha superficie de 300 metros cadrados na nova zona de acceso á área canina. Tamén se creará unha nova zona de entrada e de lavado dos animais. O peche deste espazo tamén será restaurado e está previsto o axardinamento do perímetro, ademais do acondicionamento da zona que pasa a ser do parque.

Está previsto que esta actuación se complete nun prazo de tres semanas. O Goberno de Inés Rey continúa dando pasos para que as persoas con animais dispoñan de espazos de calidade ao aire libre. O pasado ano aprobouse a nova Ordenanza de animais, coa inclusión da cala de Bens como praia canina durante todo o ano.