Con carácter xeral, o aboamento da subvención realizarase tras a presentación e aprobación da xustificación nos termos establecidos neste convenio.

Perderase o dereito ao cobro total ou parcial da subvención no suposto da falta de xustificación ou concorrencia dalgunha das causas previstas no artigo 37 da LGS, e cando non se acredite que estivesen cubertas polo menos 80 das 95 prazas ofertadas.

Tamén se poderán realizar pagos anticipados que supoñerán entregas de fondos con carácter previo á xustificación, como financiamento necesario para poder levar a cabo as actuacións inherentes á subvención. Neste caso, a institución deberá solicitalo expresamente e constituirase unha garantía do 10% do importe total da subvención, que se realizará mediante a retención do pago polo Concello, xa sexa sobre o primeiro pago anticipado ou sobre varios ata alcanzar esta contía. Presentada a xustificación e se non existe responsabilidade por parte da institución, devolverase a cantidade retida en concepto de garantía.