Poderán obter a condición de beneficiario as federacións e asociacións de veciños, legalmente constituídas, sen ánimo de lucro e que figuren inscritas no rexistro municipal de asociacións coruñesas (REMAC) e que presenten un proxecto, programa ou actividade que se axuste ao obxecto da subvención debidamente detallado e orzado. Os proxectos, programas e actividades para desenvolver ao amparo desta convocatoria deben facilitar a difusión da entidade, o seu proxecto, valores e actividades, favorecendo a incorporación de novas persoas ás asociacións, fortalecendo as relacións entre entidades, entre as entidades e a veciñanza, contribuíndo á participación activa da veciñanza do tecido asociativo veciñal e, en definitiva, de toda a cidadanía.

Quedan excluídas desta convocatoria as entidades que sexan beneficiarias no ano 2016 dun convenio nominativo dentro dela ou de distinta área do Concello da Coruña.

Así mesmo, son requisitos esixibles aos beneficiarios, que deberán estar cumpridos con anterioridade á data da proposta de concesión da subvención, ademais dos previstos con carácter xeral no artigo 13 da Lei xeral de subvencións, os seguintes:

1. Que teñan sede social ou delegación no termo municipal da Coruña e que estean inscritas no REMAC.

2. Que, de acordo cos seus estatutos, teñan obxectivos e finalidades que sexan de interese veciñal

3. Que xustificasen a subvención anteriormente outorgada polo Concello da Coruña, agás que aínda non transcorrese o correspondente prazo de xustificación.

Estes requisitos deberanse cumprir na data na que finalice o prazo de presentación das solicitudes da subvención e deberán manterse todos eles ao longo do ano 2016.