O obxecto do presente convenio é a regulación da colaboración entre a Universidade da Coruña e o Concello da Coruña para a promoción da cultura científica, co fin de fomentar o intercambio de experiencias nos campos da docencia, a investigación e a cultura en xeral, no marco da "Cátedra de divulgación científica da UDC Isabel Zendal", de acordo co Regulamento para a creación e xestión das cátedras e aulas institucional da Universidade da Coruña, aprobado no Consello de Goberno do 28 de febreiro de 2013.

Como obxectivos estratéxicos da Cátedra destacan os seguintes:

1. A Cátedra de Cultura Científica promoverá a cultura científica e tecnolóxica na sociedade. Especialmente a cátedra incidirá no coñecemento non especializado dos principais desenvolvementos científicos e tecnolóxicos que se producen na actualidade.

2. A cátedra no ámbito da docencia formará alumnado en materia de divulgación científica, apoiándose para iso nos Museos Científicos Coruñeses.

3. A cátedra investigará e realizará estudos orientados a analizar especificamente a extensión social da ciencia, a tecnoloxía e a cultura científica e tecnolóxica. Investigará tamén as implicacións sociais do desenvolvemento científico e tecnolóxico.