Nos últimos anos, de xeito un tanto sorprendente, semella que estamos asistindo a un cambio na percepción pública do coñecemento científico. En paralelo ao auxe das redes sociais, houbo tamén un aumento dos discursos negacionistas que poñen en cuestión a tradicional confianza depositada na ciencia, outrora respetada institución social vencellada ao progreso e o desenvolvemento, aparentemente ilimitado, da humanidade. Durante a pandemia da covid-19, por exemplo, fomos testemuñas de moitas manifestacións públicas de rexeitamento da fiabilidade dos seus resultados. Hai quen interpreta este cuestionamento da súa validez como un indicio dunha perda de autoridade e aprobación en certos sectores da sociedade, que, aínda que non sexan maioritarios, ameaza con crecer e extenderse debido ao novo ecosistema de medios de comunicación, os bulos e a desinformación.

Moitas poden ser as razóns para esta muda na imaxe pública da ciencia. Quizáis poidan ter influido as profundas transformacións que experimentou a propia investigación científica nas últimas décadas, cunha metodoloxía cada vez máis sofisticada e vinculada á tecnoloxía, a chamada tecnociencia. Ou tal vez sexa que non se abordaron de xeito adecuado moitas das interrogantes e incertezas que foron xurdindo na sociedade a consecuencia do impacto crecente da súa actividade. En calquera caso, para intentar despexar dúbidas e aclarar equívocos, dende a Biblioteca Municipal Os Rosales parécenos oportuno abrir un debate sobre o papel da ciencia na actualidade e para iso invitámoste a esta charla no marco do ciclo temático CIENCIA 3.0: DO NEGACIONISMO AO TECNOUTOPISMO, co que tratamos de dar resposta a cuestións básicas, como por exemplo: Que é a ciencia en realidade? Ata que punto é fiable? Existe un só método científico? Cales son os seus límites? Para tratar de respondelas, nesta ocasión contamos coa presencia de Xavier De Donato, profesor de Filosofía da Ciencia e decano da Facultade de Filosofía na USC.