"Falaron e falaron, ata que a choiva da noite deu paso a unha mañanciña fresca e rosada."

Fragmento de Morgana en Esmelle / Begoña Caamaño

Cada Nadal trae consigo sentimentos encontrados, cun punto de saudade polos Nadais pasados, e conversas que se van estendendo na noite, mesmo ata que brilla a rosada da amañecida, cal o fragmento de Morgana en Esmelle, de Begoña Caamaño, que quixemos que encabezase este portal de Nadal das bibliotecas como temperá homenaxe á escritora á cal se lle dedicará o Día das Letras Galegas no próximo ano, 2026.

Pero o Nadal non só é saudade do pasado: tamén é presente, e crear lembranzas neste presente que axuden a despedir un ano que marcha e darlle a benvida ao novo.

Participa connosco do que temos preparado (xogos, obradoiros, contacontos... e mesmo un concerto!) e bota un ollo á nosa guía que, ano tras ano, deixa na túa porta as nosas suxestións de "Historias de regalo" para estas datas.

Agardámoste e aproveitamos para desexarche, desde este recunchiño, felices festas!

Actividades de Nadal

Día e hora	Biblioteca	Actividade
Xoves 18, 19:30h	Biblioteca de Estudos Locais	Concerto de Nadal
Venres 19, 17h.	Biblioteca Sagrada Familia	Obradoiro de decoración de Nadal
Venres 19, 18:30h.	Biblioteca Durán Loriga	Presentación de libro+contacontos
Sábado 20, 10:30h	Biblioteca Os Rosales	Xogos de mesa
Luns 22, 18h	Biblioteca Monte Alto	Representación teatral
Venres, 02 de xaneiro	Varias bibliotecas	Visita dos paxes reais ás bibliotecas municipais

Recomendacións de Nadal

Podes desfrutar en liña de recomendacións de lectura, ideas de agasallo, e propostas de cinema e música, xunto con curiosidades da Coruña. 

Estamos rematando para ti a nosa guía "Historias de regalo" 2025! Axiña estará dispoñible. Mentres, se queres inspirarte, bota un ollo á de 2024, porque as cousas boas non teñen data de caducidade!