En 2025 cúmprense oitenta anos da fin da Segunda Guerra Mundial, a maior traxedia da historia contemporánea. O 2 de setembro de 1945, o emperador Hirohito asinaba a rendición de Xapón a bordo do acorazado USS Missouri, poñendo punto final a un conflito que xa rematara en Europa coa caída de Berlín meses antes.

Aquel momento histórico marcou o inicio dunha nova orde internacional: o nacemento das Nacións Unidas, o ascenso das superpotencias (EE.UU. e URSS), a Guerra Fría, a descolonización, a perda de influencia europea e a transformación xeopolítica do planeta.

O ciclo temático "Unha paz de 80 anos: da fin da II Guerra Mundial á nova orde internacional", convida a repensar esa etapa decisiva e as súas consecuencias ata hoxe. A pesar de oito décadas de relativa estabilidade, moitas das tensións actuais beben dos conflitos non resoltos daquela época.

Actividades do ciclo:

Ao longo do ciclo ofreceranse diversas propostas para público adulto:

• Mostra documental con materiais bibliográficos de diferentes tipoloxías arredor da temática.
• Sesións especiais dos programas El Pensatorio e Café con Libros, dedicadas a lecturas e debates sobre memoria, historia e identidade.️
• Dúas charlas con expertos:
  • Charla. Memorias para despois dunha guerra mundial, 1945-2025 - Xosé Manoel Núñez Seixas, Catedrático de Historia Contemporánea na USC (22 de outubro, 18:30 h)
  • Charla. Escribir as guerras - Antón Riveiro Coello, escritor (18 de novembro, 18:30 h).

Un convite a mirar o pasado para comprender o presente e a pensar, dende a biblioteca, como se constrúe -ou se perde- a paz no mundo contemporáneo.