• Primeiros cómics (3-6 anos)

Os primeiros cómics son unha magnífica porta de entrada ao mundo da lectura. A través de historias sinxelas, ilustracións expresivas e pouco texto, os máis pequenos descobren como seguir unha narración en viñetas, desenvolven a súa imaxinación e adquiren os primeiros hábitos lectores dun xeito divertido. Nesta selección atoparás álbums e cómics especialmente pensados para compartir en familia ou para as primeiras lecturas autónomas

• Primeiras lecturas (6-8 anos)

Nesta etapa, os nenos e nenas comezan a gañar autonomía como lectores e lectoras. Os cómics ofrecen historias cheas de humor, aventuras e personaxes inesquecibles, cun equilibrio perfecto entre texto e ilustración que favorece a comprensión lectora e esperta o gusto pola lectura. Aquí atoparás series ideais para dar os primeiros pasos no mundo da banda deseñada.

• Novos lectores (a partir de 9 anos)

A medida que medran, tamén o fan os seus intereses. Nesta selección reúense cómics con tramas máis elaboradas, personaxes complexos e aventuras que abranguen xéneros como a fantasía, a ciencia ficción, o misterio, a historia ou o humor. Unha etapa perfecta para descubrir novas coleccións e converter a banda deseñada nun hábito lector. 

• Lecturas xuvenís (12+ anos)

A adolescencia abre a porta a historias máis longas e profundas, con temas próximos ás súas inquietudes e intereses. Novela gráfica, manga, aventuras, fantasía, ciencia ficción ou historias realistas conviven nunha selección que permite seguir gozando da lectura e descubrir autores e autoras fundamentais da banda deseñada contemporánea. 

Hai personaxes que acompañan xeracións enteiras de persoas lectoras e outros que conquistan a quen se achega por primeira vez á banda deseñada. Nas Bibliotecas Municipais da Coruña podes descubrir clásicos imprescindibles e tamén novos heroes e heroínas que seguen facendo medrar o universo do cómic infantil.

A continuación atoparás algúns dos máis populares:

• Astérix e Obélix - Humor, aventuras e historia para toda a familia.
• Tintín - Misterios, viaxes e grandes aventuras arredor do mundo.
• Os Pitufos - Un clásico cheo de humor e amizade.
• Lucky Luke - O vaqueiro que dispara máis rápido ca a súa sombra.
• Yakari - Aventuras na natureza protagonizadas por un pequeno indio sioux.
• Hilda - Unha nena curiosa que vive rodeada de criaturas fantásticas.
• Mamut (colección) - Primeiros cómics sen palabras e de lectura moi sinxela para iniciarse na banda deseñada.
• Superpatata - Humor e aventuras para as primeiras lectoras e lectores.
• Animalotes (The Bad Guys) - Un grupo de animais pouco convencionais que intentan facer o ben.