• Voz e Letras: Roteiro Literario Feminino para a Infancia da Biblioteca Fórum o 13 de maio ás 18.30 h, uha actividade dinámica e divertida onde a rapazada poderá achegarse á riqueza da nosa lingua mentres descobre as figuras femininas máis importantes da nosa literatura.
• Encontro-charla: "Memoria viva e letra escrita" Encontro ao redor da figura de Begoña Caamaño 15 de maio ás 18.00 horas na Biblioteca Ágora. No encontro, arredor da figura de Begoña Caamaño participará Beatriz Maceda, autora de "Morgana e o pracer da amizade", e Marga do Val, amiga persoal da autora. (Entrada libre ata completar a capacidade)
• Encontros para familias na Biblioteca Os Rosales:

          - Encontros para familias. Especial Xentiña da terra: "Onde nace a lingua"

          - Encontros para familias. Especial Xentiña da terra: "Dende Exeria a Begoña Caamaño"

          - Encontros para familias. Especial Xentiña da terra: "Onda Caamaño"

• Proxección continua do documental Begoña Caamaño: navegar no pracer do azul , unha produción da Real Academia Galega dirixida por Damián Varela e Alba López. Do 11 ao 23 de maio na Biblioteca Ágora.
• Mostras bibliográficas en todas as bibliotecas As mulleres das letras e voz de Begoña Caamaño
• Concerto de  Ialma no AgoraSón da primavera 2026  organizado polo Servizo de Normalización Lingüística ( Lingua ), 15 de maio ás 21.00 horas no Centro Ágora (dende o luns 11 de maio, entregaranse un máximo de dúas invitacións por carné de socia/o das Bibliotecas Municipais da Coruña (até esgotárense) ao coller libros ou outro material en galego para os levar en préstamo.
• Entrevista especial en Bibliosons: Entrevista ás Ialma polo AgoraSón da Primavera 2026

Ao longo da historia do Día das Letras Galegas, só un pequeno número de mulleres conseguiu ocupar o lugar central desta celebración dedicada á lingua e á cultura galegas. Escritoras, poetas, mestras, xornalistas, músicas e creadoras que, malia as dificultades do seu tempo, deixaron unha pegada imprescindible na nosa memoria colectiva.

Aproveitamos a celebración desta edición para reivindicar e darlles visibilidade ás mulleres homenaxeadas ata o momento, figuras fundamentais para entender a evolución da literatura e da creación cultural en Galicia.

• 1963 · Rosalía de Castro (1837-1885)

Figura esencial da literatura galega e símbolo do Rexurdimento. Coa súa obra, Rosalía devolveu dignidade literaria á lingua galega e abriu un camiño que continúa vivo hoxe.

• 1987 · Francisca Herrera Garrido (1869-1950)

Narradora e poeta coruñesa, considerada unha das primeiras mulleres en escribir novela en galego. A súa obra deulles voz ao mundo rural e ás mulleres da súa época.

• 2007 · María Mariño (1907-1967)

Poeta singular e profundamente innovadora. A súa escrita, marcada pola forza simbólica e a conexión coa natureza, foi recoñecida de maneira tardía como unha das voces máis orixinais da poesía galega.

• 2018 · María Victoria Moreno (1939-2005)

Escritora e profesora comprometida coa lingua galega e coa lectura entre a mocidade. Foi pioneira na literatura infantil e xuvenil en galego.

• 2021 · Xela Arias (1962-2003)

Poeta, tradutora e editora. A súa obra rompeu moldes tanto na linguaxe como na forma de entender a poesía, e converteuse nun referente contemporáneo das Letras galegas.

• 2024 · Luísa Villalta (1957-2004)

Escritora, violinista e intelectual coruñesa. A súa obra combinou literatura, música e pensamento crítico cunha mirada profundamente comprometida coa realidade social e cultural.

• 2025 · As cantareiras

Por primeira vez, o Día das Letras Galegas recoñece de maneira colectiva as mulleres transmisoras da tradición oral e musical galega. As cantareiras foron fundamentais para conservar e transmitir a lingua, a memoria e a cultura popular.

• 2026 · Begoña Caamaño (1964-2014)

Xornalista e escritora feminista, destacou pola súa defensa da lingua galega e pola revisión crítica dos relatos tradicionais desde unha perspectiva de xénero. A súa obra converteuse nun referente da narrativa galega contemporánea.