Con motivo da celebración do Día Internacional da Muller o 8 de marzo, queremos pór unha mirada cara adiante e achegarnos ao campo da Informática e a Tecnoloxía, no que, cada vez máis, se enche de mulleres pioneiras que van abrindo camiños nas ciencias.

Contaremos con Nieves R. Brisaboa, catedrática de linguaxes e sistemas informáticos da Universidade da Coruña (UDC). No 1996 creou o Laboratorio de Bases de Datos (LBD) que dirixe dende entón e que foi declarado grupo de investigación de excelencia pola Xunta de Galicia.

Manifestou en repetidas ocasións a súa preocupación pola pouca presencia das mulleres nos estudos de Informática, e participa activamente na iniciativa ICT-Girls da UDC. Como socia de AMIT (Asociación de Mulleres Investigadoras & Tecnólogas) anima ás rapazas a considerar a Informática nos seus estudos e futuro laboral.

Por isto mesmo, terémola para que nos conte de primeira man a súa experiencia, as dificultades e retos superados e como ve o futuro das mulleres no campo da tecnoloxía.