DÍA INTERNACIONAL DOS MUSEOS

O ICOM organiza cada 18 de maio o Día Internacional dos Museos, este ano baixo o tema «Museos unindo un mundo dividido» para destacar o potencial dos museos como pontes entre as divisións culturais, sociais e xeopolíticas, fomentando o diálogo, o entendemento e a paz dentro e entre as comunidades de todo o mundo. O MUNCYT A Coruña organiza actividades especiais o 16 de maio, como punto de arranque da programación destinada á divulgación da eclipse que se poderá observar desde A Coruña o 12 de agosto. Visitas guiadas, xogos de pistas e actividades arredor da colección do museo completarán a oferta do museo para o DIM 2026.

• TALLER "ECLIPSES PARA MENTES INQUIETAS". Dotará as persoas participantes de recursos para vivir o trío de eclipses que cruzarán a península Ibérica de forma segura e asombrosa a través de actividades prácticas e creativas. Taller impartido por Fernando de Retes, físico, profesional das artes escénicas, Embaixador Starlight da Eclipse, divulgador astronómico pola Federación de Asociacións Astronómicas de España. Sábado 16 ás 17.00 h. Público familiar (a partir de 6 anos), reserva previa.
• ESPECTÁCULO "O QUE (NON) SE VE" . ESPECIAL ECLIPSES. Neste espectáculo para todos os públicos cheo de astronomía e humor desvelaranse as historias, os descubrimentos, a música, as lendas e os nomes propios escondidos no ceo nocturno. Interpretado por Fernando de Retes da compañía Cosmos, membro da Rede ACTS (Rede de Arte, Ciencia, Tecnoloxía e Sociedade) e dende 2025, empresa de artes escénicas recoñecida co Certificado Starlight polo seu traballo de difusión de astrofísica. Sábado 16 de maio, ás 19.00 h. Público xeral, reserva previa.

FESTIVAL RESIS "A PROXECCIÓN SONORA V"

Posta en escena do proxecto didáctico e inclusivo que, baixo o título "Aqua Matrix", culminará nunha instalación que combinará unha serie de esculturas e obxectos sonoros relacionados coa auga, acompañados de pezas de videoarte. Durante os talleres, as persoas participantes traballarán con técnicas de creación plástica, narración oral, teatro, danza ou experimentación con ferramentas dixitais para crear pezas sonoras e audiovisuais. Sábado 9 ás 13.00 h. Público xeral. Entrada libre ata completar a capacidade.

TALLER TECNOLÓXICO FAMILIAR "CONSTRUCIÓN DUN TELÉGRAFO"

Para lembrar as primeiras emisións de Samuel Morse en maio de 1844, neste taller, presentarase algúns dos sistemas de transmisión máis coñecidos e analizaremos as diferenzas entre a codificación e o cifrado de información. A continuación, desenvolverase o proxecto: construción dun telégrafo e a súa conexión a un receptor electrónico encargado de ler o código Morse e transformalo en texto. O texto mostrarase nunha pantalla LED. Para probalo, utilizarase unha táboa de representación do código Morse para practicar. Sábado 23 ás 12.00 h. Público familiar (8-12 anos), reserva previa ou en despacho de billetes.

COMPETICIÓN "WORLD ROBOT OLYMPIAD"

Competición de robótica educativa de ámbito internacional que ofrece ás persoas novas unha oportunidade para achegarse de maneira lúdica e divertida á tecnoloxía e a enxeñería. Os e as estudantes, coa orientación dunha acodes adestradora, deben construír un robot innovador que supere un reto. Os equipos deben rexistrarse con antelación nas distintas categorías e a competición aberta ao público xeral ás 12.00 h, ten entrada libre ata completar a capacidade. Sábado 30 en horario de mañá. Consultar as condicións de participación.

EXPOSICIÓN TEMPORAL "OS INSTRUMENTOS DE HUMBOLDT"

En xuño de 1799, Humboldt partía do porto da Coruña a bordo a fragata Pizarro para emprender a súa grande exploración de América. Con el levaba unha colección de 42 dos instrumentos de medida máis modernos e precisos da época... Con este fito como punto de arranque, a exposición profunda nunha das facetas máis descoñecidas -e paradoxalmente- máis decisivas de Humboldt. Popularizado como naturalista e ecólogo, xeralmente pásase por alto a súa fascinación coa tecnoloxía punta e a súa obsesión coa metroloxía. Estaba convencido de que só efectuando unha medición sistemática e precisa da maior cantidade posible de fenómenos e variables chegaría a inferir as leis e relacións que rexen a natureza. Como así foi.

FINS DE SEMANA

• TALLERES INFANTÍS. Sábados ás 11.15 h. Público infantil (6-12 anos). Actividades sobre luz e óptica, electricidade e electrónica ou xogos de construción serán algunhas das nosas propostas.
• XINCANAS FAMILIARES. Sábados ás 13.15 e 18.00 h. Domingos ás 13.15 h. Público familiar (6‑12 anos). "Gabinetes de curiosidades: un mundo máxico e misterioso!" para saber sobre as coleccións privadas de nobres e científicos que deron orixe a moitos museos; ou "O motor que cambiou o mundo" para aprender sobre os cambios tecnolóxicos na Revolución Industrial.
• XOGO DE ESCAPE SOBRE ALBERT EINSTEIN. Sábados ás 16.00 h. domingos e festivos ás 11.15 h. Público familiar (a partir de 8 anos). Retos e desafíos en equipo para atopar o contrasinal dunha caixa forte, en cuxo interior atoparedes algo para axudar a dar luz ás ideas de Einstein, cando se cumpren 120 anos da súa famosa fórmula E=mc2.
• CURTOCIRCUÍTOS E VISITAS FAMILIARES. Sábados e domingos ás 12.30 h, sábados sesión adicional ás 17.00 h. Público xeral e familiar (idade recomendada a partir de 6 anos). Visitas guiadas nas que coñecer os tesouros do museo, enxeñosos inventos e sorprendentes descubrimentos tanto para público xeral como na súa versión familiar na que, ademais de percorrer a colección do museo, se realizará o xogo de pistas "Únete á forza... do século XX" a e unha actividade participativa sobre física ou a exposición temporal sobre os instrumentos usados por Humboldt.