O programa inclúe:

a) Estadía na República de Irlanda durante o período correspondente a catro semanas, vivindo nunha residencia de estudantes.

b) Curso preparatorio on-line, previo á estadía, de 10 horas de duración durante unha semana, no que se impartirán conceptos básicos para manexarse no día a día no país de destino.

c) Xestión integral dos preparativos da viaxe e asistencia técnica ás familias.

d) Viaxe e desprazamentos de ida e volta dende A Coruña até a poboación de destino.

e) Transporte interior, aloxamento e manutención en réxime de pensión completa en residencia de estudantes.

f) Asistencia a clases intensivas de inmersión lingüística durante un mínimo de 15 horas semanais. As clases serán impartidas por nativos ou persoal acreditado co C2 (MCERL).

g) Desenvolvemento dun programa lectivo extraescolar e de ocio que incluirá actividades deportivas e culturais, así como unha visita semanal a un centro de interese histórico-cultural.

h) Titoría e atención integral ao alumnado participante desde a saída ata o regreso, con acompañamento de monitores.

i) Seguimento e control por parte de persoal especializado (coordinador territorial) da vida do alumnado na residencia de estudantes, do seu comportamento e rendemento académico, así como da súa vida social.

j) Seguro de accidentes de responsabilidade civil cun importe mínimo de 150.000 € por participante.

SOLICITUDE:

As persoas interesadas en participar en cada convocatoria deberán presentar unha solicitude de xeito telemático no apartado específico da sede electrónica da Deputación da Coruña, SUBTEL.

Non se admitirá máis dunha solicitude por persoa.

Dado que a tramitación será telemática:

• A persoa que presenta a solicitude deberá dispoñer dun enderezo de correo electrónico que non poderá variar ao longo de toda a tramitación do expediente, xa que as comunicacións dirixiranse a ese enderezo. Excepcionalmente poderase, de forma xustificada, modificarse o enderezo inicial coa obriga de notificar a dita circunstancia á Deputación.
• A persoa que presenta a solicitude deberá dispoñer de certificado dixital.
• A solicitude e toda a documentación estará asinada pola persoa que presenta a solicitude.(no caso de nomeamento de persoa representante, este deberá vir asinado a maiores polo/a solicitante da bolsa)

Para o caso dos/as menores de idade a persoa solicitante será sempre o/a menor e a persoa representante será o pai, nai ou titor legal do menor, que se responsabilizará de todas as obrigas derivadas de que o seu fillo/a sexa titular/beneficiaria da bolsa.