DÍA INTERNACIONAL DA MULLER

O Día Internacional da Muller, que empezou a conmemorarse pola ONU en 1975, atopa as súas orixes nas manifestacións das mulleres que reclamaban a comezos do século XX o dereito ao voto, mellores condicións de traballo e a igualdade entre xéneros.

• CONFERENCIA PERFORMATIVA "BAILAR NO CEO: A MAXIA DE VOAR" CON ANA ABAD. Sábado 7 ás 18.00 h. Público xeral, reserva previa. Partindo do texto gañador da bolsa de dramaturxia do Centro Dramático Galego (2022), a autora Ana Abad de Larriva ofrece unha aproximación á figura de Elisa Patiño, pioneira da aviación, e á de José Piñeiro, primeiro aviador galego destacado polas súas acrobacias. Elisa Patiño realizou un voo o 12 de outubro de 1913 na praia de Baltar, en Sanxenxo, e permanece como unha pioneira esquecida na historia da aviación, merecedora de figurar xunto a mulleres icónicas como Raymonde Laroche, primeira en obter licenza de pilotaxe en 1910, ou Harriet Quimby, que cruzou a canle da Mancha en 1911.

TALLERES INFANTÍS

Os sábados, co taller "Acidificación dos océanos" actividades orientadas a concienciar sobre os problemas que xera a absorción de CO2 por parte dos océanos. E os domingos, co taller "Tecnoloxía polo clima", actividades relacionadas coa redución do consumo enerxético ou alternativas na xeración de enerxía, cun enfoque sustentable e biomimético. Sábados e domingos ás 11.15 h. Público infantil (6-12 anos). Reserva previa ou no despacho de billetes.

CURTOCIRCUÍTOS E VISITAS FAMILIARES

Visita ás pezas de gran tamaño da sala Maiúsculas, a cámara de tesouros do museo, o traballo de inventores, a cabina do Boeing que trasladou o Guernica de Picasso ou os 100 obxectos da Sala S. XX. Na visita familiar, percorreredes a colección do museo seguindo o fío temático de diversas mulleres científicas e inventoras, incluíndo no percorrido un xogo de pistas e unha actividade participativa sobre meteoroloxía e clima, entre outros temas. Sábados e domingos ás 12.30 ou 17.00 h, segundo o horario de apertura. Publico xeral e familiar (idade recomendada, a partir de 6 anos). Reserva previa ou no despacho de billetes.

XINCANAS FAMILIARES

Xogos de pistas sobre mulleres na historia e temáticas que levarán as persoas participantes a coñecer as novas exposicións temporais do museo. Sábados ás 13.15 e 18.00 h, domingos ás 13.15 h. Público infantil (6-12 anos). Reserva previa ou no despacho de billetes.

DÍA METEOROLÓXICO MUNDIAL

Cada 23 de marzo conmemórase a entrada en vigor, en 1950, do Convenio polo que se estableceu a Organización Meteorolóxica Mundial. O tema de 2026 é "Observar hoxe, protexer o mañá", para destacar o cambio climático como unha ameaza real e innegable para toda a nosa civilización. Os seus efectos xa son visibles e serán catastróficos se non actuamos agora.

• CHARLA "ANTÁRTIDA: VIVINDO NA FRONTEIRA DO CAMBIO CLIMÁTICO" CON JOSÉ VICENTE ALBERO. Xoves 26, ás 19.30 h. Público xeral, entrada libre ata completar a capacidade. Charla divulgativa organizada con AEMET para celebrar o Día Meteorolóxico Mundial, centrada na actividade na Antártida e especialmente no traballo que alí desenvolve AEMET. A charla permite coñecer o interior dunha base de investigación e mostrar as paisaxes e a fauna do continente. José Vicente, membro de AEMET en Andalucía, participou en máis dunha ducia de campañas antárticas dende 2003. Nelas encargouse da instalación e do mantemento de equipos meteorolóxicos nas Bases Antárticas Españolas, a transmisión de datos por satélite e a operación de observatorios meteorolóxicos e de radiación solar. Ademais, colaborou en proxectos do programa polar, así como en actividades de divulgación e publicacións relacionadas co seu labor.

EXPOSICIÓN TEMPORAL "OS INSTRUMENTOS DE HUMBOLDT"

En xuño de 1799, Humboldt partía do porto da Coruña a bordo da fragata Pizarro para emprender a súa grande exploración de América. Con el levaba unha colección de 42 dos instrumentos de medida máis modernos e precisos da época. Con este fito como punto de arranque, a exposición profunda nunha das facetas máis descoñecidas -e paradoxalmente máis decisivas- de Humboldt. Popularizado como naturalista e ecólogo, xeralmente pásase por alto a súa fascinación coa tecnoloxía punta e a súa obsesión coa metroloxía. Estaba convencido de que só efectuando unha medición sistemática e precisa da maior cantidade posible de fenómenos e variables chegaría a inferir as leis e relacións que rexen a natureza. Como así foi.

EXPOSICIÓN TEMPORAL "EN DEFENSA DA ANTÁRTIDA"

A exposición busca difundir o labor científico que España desenvolve na Antártida de forma ininterrompida desde a primeira Campaña Antártica Española (1987-1988). O percorrido pon en valor as características destas campañas e os programas de investigación, técnica e innovación apoiados polo Ministerio de Defensa, ademais de mostrar o modelo de cooperación entre institucións coordinado polo Comité Polar Español, adscrito ao Ministerio de Ciencia, Innovación e Universidades. A mostra ofrece un itinerario visual e didáctico sobre os aspectos xeográficos, biolóxicos, ambientais e históricos do continente, destacando tamén o papel das Forzas Armadas. O seu contido preséntase mediante paneis e unha recreación con materiais utilizados nas campañas.