Crear espazos de encontro e reflexión arredor da memoria do colectivo LGBTIQA+ en Galiza é o obxectivo central do Memoria Diversa.

Lugar: Espazo de Intervención Cultural Normal R/ Paseo de Ronda, 47. 15011- A Coruña

Ademais, co obxectivo de espallar este coñecemento e facilitar o acceso a investigadoras e público xeral, as xornadas emitiranse en streaming a través da canle de YouTube da Deputación da Coruña, onde o material quedará aloxado como arquivo histórico.

A xornada de mañá arrancará ás 10:00 h coa inauguración a cargo de Sol Agra Tuñas, seguida da intervención da historiadora Guillermina Domínguez, quen falará sobre a homosexualidade negada das mulleres no franquismo. A continuación, a mesa "Por que ninguén falou delas?" abordará a represión do Padroado de Protección á Muller a través de Silvia Fernández Quinteiro, Belén Cillero e Daniela Ferrández. A mañá pecharase cun espazo dedicado aos arquivos da memoria queer, coa participación da Fundación 26 de Diciembre, a Asociación Palestra e a Comisión para a Recuperación da Memoria Histórica da Coruña.

Pola tarde, o congreso abordará a memoria do activismo e as denominadas terapias de conversión. Contarase coas testemuñas de Pablo Andrade e Rubem Centeno (Maribolheras Precarias / Colectivo Gai Compostela) e do avogado e presidente de 'No es terapia', Saúl Castro. O eixe cultural e literario virá da man de Fernando Olmeda (autor do fito El látigo y la pluma) e Andrea Momoitio (Farsante). O broche de ouro porao o peche musical de Lucía Aldao.

Como en edicións anteriores, as mesas estarán presentadas e moderadas polas principais entidades do asociacionismo LGBTIQA+ galego actual: LesCoruña, Arelas, Avante LGBT, ALAS Coruña e o club de lectura QUEERuña.