PROGRAMACIÓN ESPECIAL ECLIPSE

• Charla sobre as Eclipses no cinema. Venres, 3 de xullo ás 19.30 h. Público xeral, entrada libre ata completar capacidade. Charla de Martin Pawley, crítico de cinema e membro da Agrupación Astronómica Coruñesa Ío, sobre a presenza das eclipses de Sol no cinema. A sesión combina explicación e fragmentos de películas para explorar como este fenómeno foi representado na pantalla.
• Charla "Eclipse á vista". Mércores 8 de xullo ás 19.30 h. Público xeral, entrada libre ata completar capacidade. Impartida por Óscar Blanco Varela, divulgador científico, astrofotógrafo e xestor astronómico. Viaxeiro incansable e cazador de ceos escuros, documentou fenómenos astronómicos globais nos cinco continentes, incluíndo 9 eclipses totais de Sol, auroras boreais e o firmamento austral. Actividade en colaboración coa Asociación de Amigos da Casa das Ciencias e a Fundación CORBI.
• Taller de caixas estenopeicas. Mércores, 15 de xullo, 2 sesións, ás 16.00 h. Público familiar (3-7 anos,) e 18.00 h. (Público xeral, a partir de 8 anos), reserva previa. Construción dunha caixa estenopeica para observar o Sol de forma segura durante a eclipse. Inclúe unha breve introdución ao fenómeno e ás medidas de seguridade, seguida dunha posta en práctica no exterior. Cada participante construirá e levará a casa a súa propia caixa. Impartido pola Agrupación Astronómica Coruñesa Ío.
• ECLIPSE: Charla-taller divulgativa para mirar ao ceo, entender o universo. Sábado 1 de agosto ás 12.00 h. Público familiar (a partir de 6 anos), reserva previa. Unha invitación para espertar o asombro polo universo, a motivar o interese pola ciencia e a comprender que é unha eclipse e como observalo con seguridade. Impartida por Juan F. Cabrero Gómez, Físico instrumentalista do Departamento de Óptica Espacial do Instituto Nacional de Técnica Aeroespacial (INTA).
• Exposición divulgativa sobre a eclipse elaborada pola Agrupación Astronómica Coruñesa Ío. Xullo e agosto. Percorrido por paneis "A nosa estrela: a eclipse total de Sol 2026" que explican que é unha eclipse de Sol, por que é un fenómeno excepcional e que podemos esperar o 12 de agosto de 2026. A exposición combina explicacións e recursos visuais para comprender e prepararse para o evento.

EXPOSICIÓN TEMPORAL "DA TERRA AO REFUXIO"

A través da mirada do fotógrafo Juan Luis Rod e da arquitecta Patricia Muñiz, a exposición pon o foco nas necesidades das comunidades afectadas en Cabo Delgado (Mozambique) polos conflitos armados e os impactos climáticos extremos, que provocaron centos de desprazamentos. Entenderemos, a través dun proxecto de investigación da Universidade da Coruña e a implementación dos refuxios por parte a Fundación Axuda en Acción, como se coordinaron solucións adaptadas ás dinámicas culturais, sociais e ambientais da rexión. Ata o 27 de setembro.

EXPOSICIÓN TEMPORAL "OS INSTRUMENTOS DE HUMBOLDT"

En xuño de 1799, Humboldt partía do porto da Coruña a bordo da fragata Pizarro para emprender a súa gran exploración de América. Con el levaba unha colección de 42 dos instrumentos de medida máis modernos e precisos da época... Con este fito como punto de arranque, a exposición profunda nunha das facetas máis descoñecidas -e paradoxalmente máis decisivas de Humboldt. Popularizado como naturalista e ecólogo, xeralmente pásase por alto a súa fascinación coa tecnoloxía punta e a súa obsesión coa metroloxía. Estaba convencido de que só efectuando unha medición sistemática e precisa da maior cantidade posible de fenómenos e variables chegaría a inferir as leis e relacións que rexen a natureza. Como así foi.

TALLERES

• Talleres infantís. Martes-venres ás 11.15 h, do 14 de xullo ao 28 de agosto, agás días con actividades especiais. Público infantil (6-12 anos). Nos talleres traballarase con métodos como a observación, experimentación ou habilidades para o desenvolvemento tecnolóxico para tratar diversas temáticas: electricidade (14-17 xullo), química (do 21-24 de xullo), cinema e stop-motion (do 28-31 xullo), astronomía (4-7 agosto), nanomundo (11-14 agosto), enxeñaría e medio ambiente (18-21 agosto), bioloxía (25-28 agosto).
• Taller de caixas estenopeicas: Mércores, 15 de xullo. Aprende a observar o Sol de forma segura durante a eclipse do 12 de agosto mediante a construción dunha caixa estenopeica, un sinxelo dispositivo que permite proxectar a imaxe do Sol sen necesidade de miralo directamente. A actividade combina unha introdución ao fenómeno das eclipses solares e ás recomendacións básicas de seguridade coa construción dunha caixa estenopeica que os participantes porán a proba no exterior. Ao finalizar, cada persoa poderá levar a súa propia caixa para utilizala o día da eclipse.

XINCANAS FAMILIARES

Martes-sábado ás 13.15 e 16.00 h, domingos e festivos ás 13.15 h. Público familiar (6-12 anos). Xogos de pistas por equipos para coñecer o museo a través de diversas temáticas: literatura fantástica, as obras de Xulio Verne, os grandes inventos de Torres Quevedo, as viaxes espaciais, o traballo de científicas e tecnólogas, a natureza que inspira a tecnoloxía, a sostibilidade ou os xoguetes que temos no museo.

A BUSCA DO TESOURO

Martes-sábado ás 18.00 h. Público familiar (6-12 anos). A popular procura do tesouro faravos percorrer o museo, resolvendo distintos retos ata localizar un tesouro conservado polo MUNCYT, tras o que recibiredes un pequeno obsequio por lograr completar o percorrido.

CURTOCIRCUÍTOS E VISITAS FAMILIARES

Martes-sábado ás 12.30 e 17.00 h, domingos e festivos ás 12.30 h. Público xeral e familiar (idade recomendada a partir de 6 anos). Visitas guiadas para todos os públicos e visita familiar que inclúe un xogo de pistas e unha actividade participativa temática sobre electricidade, cinema, son, enerxías, matemáticas, química, entre outras.