- Inicio
- Actividades
- Destacadas 2024
- Mujer y Ciencia
Campaña Muller e Ciencia
Campaña polo Día da Muller e a Nena na Ciencia
En ciencia e tecnoloxía, como noutros campos profesionais, as mulleres foron invisibles ao longo da historia e, en moitos casos, o seu traballo atribuído aos homes, tanto é así que non temos ningunha dificultade en citar a 10 científicos, pero si que temos que pensar no nome de 10 científicas.
O próximo 11 de febreiro terá lugar o día da Muller e a Nena en Ciencia, desde as Bibliotecas Municipais queremos renderlle a nosa particular homenaxe a científicas galegas que cada día traballan desde os seus campos de investigación para mellorar a sociedade na que vivimos. Para iso destacaremos a 9 para reivindicar a existencia mulleres na ciencia e dar a coñecer o seu traballo.
No marco do 11F, Día da Muller e a Nena na Ciencia, as Bibliotecas Municipais da Coruña convídanche a mergullarte na inspiradora historia de 9 mulleres científicas que deixaron a súa marca na ciencia galega.
Sabías que a historia da ciencia está chea de mulleres brillantes que contribuíron significativamente pero permaneceron nas sombras? Rachemos con ese silencio e rendámoslle homenaxe ás nosas científicas locais.
Acompáñanos durante varios días en cada unha das nosas 9 bibliotecas, onde cada espazo iluminarase coa fascinante historia dunha científica galega que desafiou barreiras e conquistou o mundo da ciencia.
Descubre, celebra e aprende sobre o impacto que estas mulleres tiveron en campos como a medicina, a tecnoloxía, a bioloxía e máis. Porque a ciencia non ten xénero, e queremos que coñezas a estas incribles pioneiras.
Únete á Campaña Muller e Ciencia na Coruña e axúdanos a visibilizar o talento feminino no mundo da ciencia!
Científicas Galegas
- Manuela Barreiro Pico, primeira muller matriculada na Universidade de Santiago de Compostela, primeira licenciada en Galicia e primeira muller en ter unha farmacia propia (1901) a farmacia Moderna en Ribadeo.
- Celia Brañas Fernández, pioneira na incorporacación da muller á cultura científica. A súa intervención no Primeiro Congreso de Estudos Galegos en 1919 foi clave para que se organizase un curso de Bioloxía Mariña na Coruña en 1920 e favoreceu a posterior creación da Estación de Bioloxía Mariña en Marín en 1932.
- Olimpia Valencia, primeira médica e xinecóloga, estudou Maxisterio pero a falta de vocación levouna a estudar tamén Medicina, licenciándose en 1925 co Premio Extraordinario e 19 matriculas de honra.
- Rita Fernández Queimadelos, primeira arquitecta galega, terceira de España. Foron as súas avoas as que intercederon por ela para poder estudar fronte ás reticiencias do seu pai. Chegou a ser a arquitecta municipal da rexión de Murcia.
- Antonia Ferrín Moreiras, primeira profesora de Matemáticas da USC, primeira astrónoma galega e a primeira muller en defender unha tese sobre Astronomía en España. O franquismo apartouna temporalmente da docencia.
- María Wonenburger, matemática galega, experta en Teoría de Grupos e en álxebras de Clifford, foi a primeira española en ser bolseira 'Fulbright', grazas á cal foi á Universidade de Yale onde se doutorou en 1957. En Toronto, era a única muller ocupando un posto de profesora de matemáticas, feito ao que se afixo ao longo da súa carreira profesional.
- Amparo Alonso Betanzos, licenciada en Química coa especialidade de Química Industrial e Doutora en Física na Universidade de Santiago de Compostela. A súa experiencia como pioneira no campo da Intelixencia Artificial e o compromiso co avance no campo das TIC en España, levouna á presidencia da Asociación Española de Intelixencia artificial e a ser experta de referencia tanto da Comisión Europea, como membro de "Reserve List" do High Level Expert Group on Artificial Intelligence (AI HLG), como do Executivo español.
- Ana Ulla Miguel: licenciada en Física pola Universidade de Santiago de Compostela, especializouse en Astrofísica na Universidade de La Laguna, onde tamén realizou a súa formación doutoral. Ocupou diversos postos de investigación e docencia na Universidade de Tromsø (Noruega), o Laboratorio de Astrofísica Espacial e Física Fundamental, a Axencia Espacial Europea ou o Instituto Niels Bohr de Copenhague. En 2014 recibiu, ex aequo con Minia Manteiga, o premio "Galega destacada 2013". Tamén foi galardoada con Muller "Científica 2020" que outorga o IES Val Miñor
- Elena Ojea: licenciada en Ciencias Ambientais pola Universidade de Salamanca, e Doutora en Economía pola Universidade de Santiago de Compostela. Na súa traxectoria postdoutoral, Elena estivo no Centro Vasco de cambio Climático (BC3) e na Escola Bren de estudos ambientais da Universidade de California en Santa Bárbara. A súa investigación ten alto impacto internacional, e ten participado en proxectos internacionais para a FAO, sendo autora no panel de alto nivel para unha economía sostible dos océanos e máis recentemente, sendo autora principal do sexto Informe do IPCC sobre Impactos e adaptación, onde participa no capítulo sobre océanos.
Científicas galegas homenaxeadas outros anos:
Tamén che pode interesar
Tes un navegador demasiado antigo!
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible