A International Games Month at your Library, "Mes Internacional do Xogo na túa Biblioteca", é unha iniciativa internacional promovida pola ALA, American Library Association.

Desde hai varios anos, durante o mes de novembro as bibliotecas participantes -públicas, escolares e académicas- organizan actividades co obxectivo de sensibilizar sobre os beneficios sociais e educativos do xogo e xerar maior adhesión afectiva ás bibliotecas:

Porque os xogos, ademais de ser unha actividade que facemos para entreternos ou divertirnos, tamén fomentan a interacción social, transformando a biblioteca nun lugar para a convivencia, nun espazo motivador e vibrante con áreas para o xogo,

Palabras de Ana Ordás no seu artigo Día Internacional dos Xogos na Biblioteca.

Como xa fixemos outros anos, sumámonos a esta iniciativa na que bibliotecas de todo o mundo potencian a presenza dos xogos nas bibliotecas.

Nesta ocasión, as Bibliotecas do Fórum Metropolitano e a de Durán Loriga propóñenche estas iniciativas nas que se destaca o valor educativo, recreativo e social dos xogos.

Actividades programadas nas bibliotecas:

• International Games Month: Xogamos no Fórum práctica e aprendizaxe de diversos xogos de mesa, para nenas e nenos con idades comprendidas entre 6 e 12 anos. A selección dos xogos utilizados na sesión estará adaptada e deseñada en función do perfil e idades dos participantes.
• International Games Month os xogos toman a biblioteca Durán Loriga:
  • Mostra bibliográfica Os xogos toman a biblioteca
  • IGM: Mesa redonda "Artesanía e creatividade galega no mundo do xogo"
  • IGM: Roteiro "As tendas do meu barrio"
  • IGM: Xogamos ao grande!
  • IGM: Xogos Miúdos con Arkhé