Este ano volvemos sumarnos a esta interesante iniciativa internacional de poñer en valor os xogos nas bibliotecas, promovida por unha organización internacional do ámbito bibliotecario, a ALA (American Library Association) e dirixida por voluntarios de todo o mundo para reconectar comunidades a través das súas bibliotecas en torno ao valor educativo, recreativo e social de todo tipo de xogos.

Na biblioteca Municipal Durán Loriga apostamos por poñer en valor o importante papel que poden tomar os xogos nas bibliotecas e entendemos que as programacións arredor dos xogos personifican a biblioteca creando un lugar comunitario para socializar e xogar. Sumámonos a esta iniciativa co obxectivo de sensibilizar sobre os beneficios sociais e educativos do xogo.

Dentro da programación para festexar o IGM na biblioteca Durán Loriga tamén pensamos nas crianzas máis pequenas e por iso invitamos a "Arkhé espacio educativo", que  nos trae o obradoiro "Bibliolab": un espazo de xogo e lectura, pensado para ler antes de ler, coas mans como elemento fundamental de aprendizaxe. Cada libro unha proposta de xogo e aprendizaxe manipulativa. Ven a xogar en familia! Esperámosvos!