A lingua é un espello do que somos, do que queremos ser, do que nos ocupa e preocupa en cada momento a cadaquén, a todos e todas como sociedade. O lugar onde as palabras existen con máis intensidade é a actualidade, ese día a día compartido no que, como tan claro nos queda nestes tempos pandémicos, o público e o privado conflúen. Por iso escoller unha Palabra do Ano significa tomar ao mesmo tempo conciencia do valor da lingua e do que designan as palabras que eliximos e creamos.

Decidir colectivamente cal é a palabra que identifica o ano que remata é tamén un xeito de resumirmos como o vivimos. No bo ou no malo. E mesmo unha maneira de redimírmonos daquilo que se quere deixar atrás. Ou unha forma de agradecer o bo e de buscar acougo. Vós decidides. Vós tendes a palabra.

FASES: 

• 1ª fase: envío das suxestións até o luns 1 de decembro ás 23:59h a través do enlace https://portaldaspalabras.gal/palabradoano
• 2ª fase: o mércores 3 de decembro anunciaranse as palabras finalistas e abrirase o periodo de votacións até as 23:59h do domingo 21 de decembro.
• 3ª fase: anuncio da Palabra do Ano nos últimos días do 2025.