INSCRICIÓN: até o 5 de xuño de 2026. 

Le atentamenta a Guía para a inscrición no procedemento de acceso e admisión nas ensinanzas artísticas superiores para o curso 2026/27.

Con carácter xeral, as solicitudes de inscrición cubriranse de xeito telemático a través do formulario dispoñible na aplicación informática «EAS» (https://www.edu.xunta.gal/eas), que permitirá a achega electrónica da documentación requirida para este procedemento. O acceso á dita aplicación poderá realizarse mediante os sistemas de identificación electrónica habilitados para o efecto.

Unha vez finalizada a solicitude na aplicación informática «EAS» e debidamente asinada, deberás presentala na Secretaría do centro de inscrición dentro do prazo establecido. A documentación requirida para o procedemento incorporarase electronicamente na citada aplicación no momento de cubrir a solicitude, polo que non será preciso presentala novamente no centro.

As persoas solicitantes que non dispoñan de documento nacional de identidade (DNI) ou número de identidade estranxeiro (NIE) poderán acceder ao formulario de inscrición directamente na Secretaría do centro. 

• 9 de xuño: publicación da listaxe provisional de persoas admitidas e excluídas.
• 10 e 11 de xuño: reclamación contra a listaxe provisional de persoas admitidas e excluídas.
• 15 de xuño: publicación da listaxe definitiva de persoas admitidas e excluídas para facer a proba.

PROBA ESPECÍFICA DE ACCESO

A proba específica de acceso ás ensinanzas artísticas superiores de Conservación e Restauración de Bens Culturais constará de 2 exercicios:

- 1º exercicio. Análise dun texto relacionado cos bens culturais, nun máximo de 90 minutos, e terá como obxecto apreciar a madureza e a formación xeral do alumnado, especialmente no referente á comprensión de conceptos, utilización da linguaxe e capacidade de síntese e relación. A cualificación do exercicio será entre 0 e 40 puntos.  

- 2º exercicio. Aptitude plástica. O tempo máximo para a realización deste exercicio será establecido polo tribunal de acceso. Este exercicio terá por obxecto apreciar as aptitudes das persoas aspirantes, tanto plásticas como específicas, para a conservación e restauración. Inclúe as seguintes probas:

1. Realización dun debuxo do natural, de enfoque mimético e con modelo real, exento e inanimado. Valorarase a fidelidade na representación, a calidade do grafismo e a precisión e acabamento do traballo.
2. Realización dun traballo sobre representación da cor. Considerarase a correcta utilización das técnicas empregadas e o grao de comprensión dos valores e calidades da cor.
3. Realización dun traballo práctico para a valoración das aptitudes específicas que requiren os estudos de Conservación e Restauración de Bens Culturais. Considerarase a habilidade manual, a meticulosidade e a pulcritude na realización do traballo.

A cualificación deste 2º exercicio, será a media aritmética da puntuación obtida en cada epígrafe, que se cualificará entre 0 e 20 puntos.

Cualificación da proba: a cualificación global da proba de acceso específica resultará da media ponderada das cualificacións obtidas nos distintos exercicios. O primeiro ponderarase nun 40 % e o segundo nun 60 %. Para a superación da proba de acceso esixirase unha cualificación igual ou superior a 5 puntos.

DATAS E LUGAR DE REALIZACIÓN: o 17 de xuño de 2026 na Escola Superior de Conservación e Restauración de Bens Culturais de Galicia.

* Deberás presentarte provista/o do teu documento documento oficial de identidade (DNI/ NIE/ pasaporte). 

• 23 de xuño: publicación cualificacións provisionais.
• 25 e 26 de xuño: reclamacións.
• 30 de xuño: publicación cualificacións definitivas.