"Seica" está conformada por case cen pezas, no seu maior parte colaxes, a especialidade do autor, pero tamén hai ensamblaxes e outros obxectos. Nesta, como noutras exposicións individuais e colectivas do autor, apréciase o seu gusto polo emprego de pequenos obxectos para crear a súa obra, desde tipos de imprenta ata ferro forxado ou cunchas, sen esquecer etiquetas de produtos comerciais, entre outros aparellos. O seu proceso creativo toca de moitos lados, de diferentes técnicas, de cousas que atopa, dun libro que cae nas súas mans... Unha vez descuberto o punto de partida dunha obra, o artista entra na colaxe cunha idea pero logo evoluciona cara outros mundos, cara o que a propia obra vaille pedindo.

Nese sentido, o artista traballa cunha linguaxe profundamente persoal, recuperando obxectos da vida cotiá para integralos e compoñer dunha forma equilibrada unha nova obra de arte. Trátase de obxectos que deixaron de empregarse, que xa non teñen utilidade, e que adquiren de novo vida propia dentro da peza, evocando recordos e ideas. A mostra componse dun centenar de obras do artista, entre as que se atopan series de temática variada. Pretende con ela, facer unha antoloxía da súa traxectoria artística e persoal. Son froito de toda unha vida dedicada á arte e pola que pasaron centos, miles, de obxectos e documentos nos que viu un "algo", unha "parte", sustancia para conformar ou crear unha obra de arte. Son o reflexo dunha sensibilidade, dunha perspectiva única, dun artista único e distinto.