Con motivo do Día das Letras Galegas 2026, as Bibliotecas Municipais da Coruña acollen a proxección continua do documental Begoña Caamaño: navegar no pracer do azul, unha produción audiovisual da Real Academia Galega dirixida por Damián Varela Pastrana e Alba López Álvarez.

O filme propón un percorrido pola vida e o legado dunha das voces máis relevantes da cultura galega contemporánea: xornalista, escritora, feminista e firme defensora da lingua galega. A través de testemuños de persoas próximas, imaxes de arquivo e dramatizacións inspiradas na súa obra literaria, o documental achega unha visión íntima e coral de Begoña Caamaño.

A película combina memoria, literatura, pensamento crítico e creación audiovisual para achegar ao público a figura dunha autora que renovou a narrativa galega desde unha perspectiva feminista e contemporánea. O documental inclúe tamén fragmentos dramatizados das súas novelas Circe ou o pracer do azul e Morgana en Esmelle.

A proxección poderá verse libremente durante o horario de apertura da biblioteca, permitindo que cada persoa se achegue ao documental ao seu ritmo.