Pedras vivas é unha peza teatral que nos leva de viaxe no tempo nun escenario natural privilexiado. A Coruña 1920, os xardíns do recheo é o lugar elixido. A literatura cobra protagonismo neste recuncho arborado á beira do mar que se converteu en escaparate para visitantes e refuxio cultural para a cidadanía. As bibliotecas municipais comezan así a súa singradura que hoxe deriva nunha rede cultural e lecer de referencia.

Noite Bohemia, a compañía teatral coruñesa que vén de gañar o premio nacional de teatro clásico, elabora da man da Agrupación Cultural Alexandre Bóveda unha proposta que fai cobrar vida ás pedras dos xardíns, os xardíns da literatura e o mar. Os nomes da nosa literatura son os grandes protagonistas desta viaxe no tempo que agora se achega até os interiores desas bibliotecas que foron medrando ao longo de todo un século. Esta cita busca levar ao público dos barrios a nosa cultura.