Obxectivos do programa "Antenas de información xuvenil"

• Conectar os diferentes Espazos municipais de información xuvenil da cidade (EIX Fórum Metropolitano, EIX Ágora, EIX Naves Metrosidero) coa mocidade a través da creación de pequenas sucursais dos EIXs nos centros de ensino, denominadas "Antenas".
• Fomentar a creación de accións de información e dinamización da información xuvenil desde os centros de ensino coa presentación de proxectos denominados "proxectos de natureza singular".

Funcións das Antenas de Información Xuvenil 

As funcións xerais das Antenas de Información Xuvenil son:

• Estar en comunicación permanente cos Espazos de Información Xuvenil da cidade.
• Manter o espazo informativo e as canles dixitais de información actualizadas semanalmente de forma ordeada a atraente.
• Difundir a información de interese xuvenil a través dos medios ao seu alcance: redes sociais, compañeiras/os de centro educativo, etc...
• Animar as/os compañeiras/os a participar da información e achegar as inquedanzas, os intereses, as ideas ou suxestións.

Compromisos das Antenas de Información Xuvenil

• Ter a dispoñibilidade para dedicar o tempo suficiente para o desenvolvemento das funcións de "Antena".
• Asistir ás accións formativas e reunións de coordinación que se convoquen.
• Manter en bo estado o material ou ferramentas cedidas polo Concello ou a empresa adxudicataria.

Contraprestacións

A persoa con función de Antena obterá as seguintes contraprestacións:

• Recibirá formación en materia de información xuvenil: dinamización de información, xestión de redes sociais, etc
• Solicitar gratuitamente o carné internacional de estudante
• Obter un certificado que acredite a súa participación no programa
• Recibir entradas a eventos organizados ou programados polo Concello da Coruña (concertos, deportes, cine , teatro, etc)
• Compensación económica de 100,00 euros brutos por colaboración educativa sendo efectuada unha vez rematado o proxecto anual. No caso de causar baixa antes da finalización do proxecto en curso non terá dereito a recibir compensación ningunha.
  • A compensación económica é por proxecto de Antena, polo que no suposto de que existan 2 persoas no proxecto, a compensación sería de 50,00 € para cada unha delas.

Documentación necesaria

A documentación a presentar por cada persoa que solicita ser Antena é a que segue:

• Formulario de solicitude debidamente cumprimentado.
• Unha copia do DNI, NIE ou documento acreditativo da identidade.
• Autorización asinada para menores de idade acompañada da copia do DNI da persoa , responsable legal, que asina a autorización.
• Proxecto, que inclúa:
  • Presentación da/s persoa/s candidata/s (nome/s e curso, gustos e intereses, participación noutros proxectos do centro, experiencia participativa ...)
  • Expectativas e intereses respecto ao programa Antenas de Información Xuvenil.
  • Ideas e propostas de como dinamizar a información no teu centro.
  • A adecuación ao centro, a orixinalidade e a viabilidade.

Unha vez realizada a selección, serán os Espazos de Información Xuvenil os que compartan coas Antenas seleccionadas, ao inicio do programa, unha pequena proposta de dinamización da información na que tamén se abordará:

• A xestión dos espazos de información xuvenil dos centros educativos.
• A difusión da información xuvenil: ferramentas para a dinamización da información en centros.
• A información virtual: proposta de difusión a través das canles dixitais.

Consulta as bases completas (adxuntas) e envíanos a túa solicitude a cmix@coruna.gal