PRAZOS DE INSCRICIÓN, tanto para o alumnado que cumpre co requisito de titulación como para o que solicita proba substitutiva de requisito de titulación: do 8 de maio ao 12 de xuño de 2026

• Publicación de listaxe provisional de persoas admitidas e excluídas: 16 de xuño.
• Período de reclamación contra a listaxe provisional: 17 e 18 de xuño.
• Publicación de listaxe definitiva de persoas admitidas e excluídas: 22 de xuño.

Con carácter xeral, as solicitudes cubriranse de xeito telemático a través da aplicación informática https://www.edu.xunta.gal/eas, empregando certificado dixital ou Chave365, e presentar nos prazos establecidos unha copia asinada da solicitude xunto coa documentación requerida no centro no que se desexe acceder como primeira ou única opción. As persoas solicitantes que non posúan DNI ou NIE poderán acceder ao formulario de inscrición directamente nas secretarías dos centros de inscrición.

Na solicitude de inscrición deberase indicar o ciclo formativo que se desexa cursar, así como a EASD ou CE.ART a que se aspire acceder, por orde de preferencia, ata un máximo 4 opcións. Así mesmo, as persoas aspirantes que precisen realizar a proba específica deberán sinalar o centro en que desexan realizar a proba.

LUGAR DE REALIZACIÓN DAS PROBAS: nas Escolas de Arte e Superiores de Deseño en que se inscribisen as persoas aspirantes.

DATAS DAS PROBAS:

* PROBA SUBSTITUTIVA DA TITULACIÓN DE BACHARELATO: 23 de xuño de 2026

• Cualificacións provisorias: 29 de xuño.
• Reclamacións: 30 de xuño e 1 de xullo.
• Cualificacións definitivas: 3 de xullo.

A proba constará de 2 partes:

• 1ª parte (10:00 - 13:00 h): materias comúns. O contido da proba versará sobre as materias comúns do currículo do bacharelato: - Lingua galega e literatura - Lingua castelá e literatura - Lingua estranxeira (inglés ou francés) - Historia de España - Filosofía. Cumprirá seleccionar 3 das ditas materias e desenvolver por escrito as cuestións que se propoñan para cada unha das tres elixidas. Nestes exercicios valoraranse a madureza e o nivel de coñecementos sobre estas áreas propias do currículo de bacharelato, o grao de madureza da persoa aspirante en canto á correcta comprensión de conceptos, a utilización da linguaxe e a capacidade de análise e de síntese.
• 2ª parte (16:00 - 17.00 h): materias específicas da modalidade. Versará sobre contidos relacionados coas materias da modalidade de Artes na vía de Artes Plásticas, Imaxe e Deseño. Consistirá na realización dun exercicio de composición e deseño onde se amosen coñecementos e aptitudes relacionados coas materias da modalidade

* PROBA ESPECÍFICA: 7 de xullo de 2026

• Cualificacións provisionais: 14 de xullo.
• Reclamacións: 15 e 16 de xullo.
• Cualficacións definitvas: 20 de xullo.

A proba constará de 3 exercicios:

• 1º exercicio (10:00 - 11:00 h): desenvolvemento por escrito, durante un tempo máximo de 1 h., de temas propostos nun texto ou por medio de documentación gráfica relacionados coa historia da arte. Neste exercicio valoraranse as capacidades lingüísticas e os coñecementos histórico-artísticos.
• 2º exercicio (12:00 - 14:00 h): realización, durante un tempo máximo de 2 h., de bosquexos sobre un tema proposto que servirán de base para a realización posterior. Neste exercicio valoraranse as destrezas, as habilidades, a capacidade de percepción, de observación e de aptitude á predisposición para os estudos dos ciclos correspondentes á familia profesional.
• 3º exercicio (17:00 - 19:00 h): execución dun exercicio, durante un tempo máximo de 2 h., de xeito que determine o tribunal, cos bosquexos realizados no exercicio anterior dun traballo relacionado co ciclo a que a persoa aspira a acceder. Neste exercicio valorarase a capacidade compositiva, así como a predisposición para os estudos dos ciclos correspondentes á familia profesional.