A recente concesión do Premio Princesa de Asturias de Comunicación e Humanidades 2023 a Nuccio Ordine, falecido lamentablemente pouco despois, semella unha boa ocasión para retomar o debate sobre a situación marxinal dos saberes humanísticos tanto no sistema educativo como no conxunto da sociedade actual, onde priman o pragmatismo e a rendabilidade. Na súa obra, o malogrado pensador, escritor e experto en literatura italiano fai unha reprobación desa deriva nos últimos anos e reivindica unha cultura orientada á formación de cidadáns libres e críticos, con capacidade para pensar por si mesmos

Tomando o seu traballo como punto de partida e inspiración, na Biblioteca Os Rosales propoñemos unha reflexión sobre o sentido do pensamento humanístico e o valor dos clásicos coa conversa 'Experiencia, coñecemento: pobreza' a cargo de Alberto Ruiz de Samaniego, que se enmarca dentro do ciclo temático A utilidade do inútil. Unha defensa dos clásicos e as humanidades.

Alberto Ruiz de Samamiego é Doctor en Filosofía e profesor de Estética na Universidade de Vigo, e crítico e comisario de exposicións, como a do Pabellón español na Bienal de Venecia en 2007, por exemplo, ou Andrei Tarkovski. Fidelidad a una obsesión, por citar so dúas de entre moitas outras. Foi tamén director da Fundación Luis Seoane. A súa obra ensaística inclúe títulos como Pintores de la vida moderna (2021) ou La musa inquietante (2022).