A recente concesión do Premio Princesa de Asturias de Comunicación e Humanidades 2023 a Nuccio Ordine, falecido lamentablemente pouco despois, semella unha boa ocasión para retomar o debate sobre a situación marxinal dos saberes humanísticos tanto no sistema educativo como no conxunto da sociedade actual, onde priman o pragmatismo e a rendabilidade. Na súa obra, o malogrado pensador, escritor e experto en literatura italiano fai unha reprobación desa deriva nos últimos anos e reivindica unha cultura orientada á formación de cidadáns libres e críticos, con capacidade para pensar por si mesmos.

Tomando o seu traballo como punto de partida e inspiración, na Biblioteca Os Rosales propoñemos unha reflexión sobre o sentido do pensamento humanístico e o valor dos clásicos coa conversa 'Unha defensa dos clásicos: Por que seguimos lendo a Stefan Zweig?' a cargo de Javier Pintor, que se enmarca dentro do ciclo temático A utilidade do inútil. Unha defensa dos clásicos e as humanidades.

Os clubs de lectura Café con libros descubriremos xuntas varias obras do escritor e compartiremos conversa co profesor de literatura e dinamizador cultural Javier Pintor, todo un referente para nós na cidade en canto a encontros literarios se refire.