O martes 3 de maio ás 19:00 h. temos na Biblioteca Municipal Fórum Metropolitano o faladoiro co arquitecto e urbanista Savio Guimaraes que nos achegará á problemática actual da convivencia entre a nenez, a mocidade e a terceira idade nas cidades.

A charla estará centrada nos aspectos máis vulnerables xa que a segmentación en espazos  segregantes das cidades interfire directamente no dereito de todas as persoas á sociabilidade e á calidade de vida posible desde o coñecemento compartido a través do diálogo e a sensibilidade cara ao outro e a súa alteridade.

Savio é arquitecto e urbanista con doutoramento en Planificación Urbana e Rexional e leva os últimos vinte anos traballando entre clases e investigacións académicas e institucionais co patrimonio cultural e a planificación urbana e rexional. Entre diversos aspectos destes campos do coñecemento está centrado no tema da  etariedade nas cidades, cada vez máis estudado pola academia e reivindicado por grupos afíns.