A recente concesión do Premio Princesa de Asturias de Comunicación e Humanidades 2023 a Nuccio Ordine, falecido lamentablemente pouco despois, semella unha boa ocasión para retomar o debate sobre a situación marxinal dos saberes humanísticos tanto no sistema educativo como no conxunto da sociedade actual, onde priman o pragmatismo e a rendabilidade. Na súa obra, o malogrado pensador, escritor e experto en literatura italiano fai unha reprobación desa deriva nos últimos anos e reivindica unha cultura orientada á formación de cidadáns libres e críticos, con capacidade para pensar por si mesmos. 

Tomando o seu traballo como punto de partida e inspiración, na Biblioteca Municipal Os Rosales propoñemos o ciclo temático A utilidade do inútil. Unha defensa dos clásicos e as humanidades, co que pretendemos reflexionar sobre o sentido do pensamento humanístico e o valor dos clásicos. Estes son os seus contidos: 

O ciclo temático consta dos seguintes contidos:

• Unha mostra documental con materiais bibliográficos sobre a temática en distintos formatos (clásicos da literatura, a filosofía e a historia). 
• Lecturas e debates dentro das sesións do trimestre dos programas O Pensadoiro-Café filosófico e os clubes de lectura Café con libros. 
• Charlas con expertos na materia: 
  • Conversa. Experiencia, coñecemento: pobreza con Alberto Ruiz de Samaniego (crítico, comisario de exposicións, filósofo e profesor de Estética na Universidade de Vigo). Mércores, 25 de outubro, 18:30 h
  • Conversa. Unha defensa dos clásicos: Por que seguimos lendo a Stefan Zweig? con Javier Pintor (Profesor de literatura e dinamizador cultural). Martes, 21 de novembro, 18:30 h