Nos clubs de lectura compartimos lecturas e compartímonos. Quéreste unir?

Os clubs de lectura son grupos de persoas que comparten, de forma coordinada, unha lectura e logo coméntana e valórana. Dende as bibliotecas proporcionamos os libros que os clubs necesitan para dar inicio a esta conversa e tamén coordinamos algúns dos grupos onde teñen cabida persoas moi diferentes entre si e intereses de moitos tipos. Non se necesita un nivel de lectura experto, pero si inquietudes culturais, gana de ler, facer amizades e intercambiar opinións de forma respectuosa e aberta. En realidade, o libro é só o punto de partida.

Se estás na procura dun club de lectura e pensas que aquí o podes atopar, bótalle unha ollada á ampla oferta de clubs de lectura que temos en marcha. Poderaste inscribir a través da páxina web, presencialmente na túa biblioteca ou chamándonos por teléfono. As prazas asígnanse por orde de inscrición.

Os  Clubs xerais  len todo tipo de xéneros, estilos, épocas...

Os Clubs de lectura temáticos  realizan as súas lecturas sempre seguindo un fío condutor: un formato, unha temática, un xénero literario etc.

Os Clubs de lectura por lingua  son aqueles que len nun único idioma: o galego.

O Club de lectura virtual é o grupo de lectura no que non hai data e hora concretas para as xuntanzas e debates, toda a participación se realiza nun blog.

Os Clubs de lectura infantís e xuvenís  son aqueles que ofrecen lecturas adaptadas a estas idades.

Os Clubs de lectura cidadáns  son grupos autónomos de persoas que nos solicitan libros en préstamo e que se reúnen fóra das bibliotecas.

O Club de lectura fácil: Fiando historias é o grupo de lectura dirixido a pacientes de saúde mental e que ten por obxectivo facer as persoas partícipes dunha actividade que lles axuda a mellorar o seu nivel de participación activa na sociedade.