Un percorrido polo noso patrimonio

Propoñemos un percorrido participativo polo noso patrimonio para rapaces e rapazas de 8 a 12 anos, onde aprender xogando e desenvolver a creatividade nun ambiente de convivencia.

Invitámosvos a visitar a mostra de libros informativos e contos arredor da tradición galega. Xunto coa mostra, propoñemos tres actividades:

• Tradición en acción: Cóntoche un traxe : os nenos e as nenas mergúllanse na tradición galega, descubrindo os traxes típicos a través da narración oral, xogos e cancións. A actividade, guiada por Montse Rivera, permite vestir réplicas de traxes e reflexionar sobre o paso do tempo e os valores culturais. Ao remate, levarán unha foto de recordo desta viaxe divertida e educativa pola nosa identidade téxtil.
• Tradición en acción: O método regueifeiro : obradoiro sobre a regueifa, poesía oral improvisada propia da tradición galega. A través do xogo e a creación de versos, as persoas participantes desenvolverán creatividade, autoestima e rapidez mental. A sesión será guiada por Lupe Blanco.
• Tradición en acción: Obradoiro: Conservas "O Noso" : a rapazada creará etiquetas ilustradas para latas simbólicas que gardarán elementos da tradición galega. A través da ilustración e a colaxe, fusionarán creatividade con patrimonio cultural, conectando coa historia conserveira de Galicia. Cada participante levará a súa propia "conserva cultural", como lembranza desta experiencia lúdica e identitaria.

Achegádevos a cantar, xogar e crear con nós! A tradición galega cobra vida na sala infantil da biblioteca Sagrada Familia... e vós sodes parte desta festa!

Lembra que as inscricións nos obradoiros comezan unha semana antes da data de realización.