O luns 29 de setembro ás 19 h., na Biblioteca Fórum Metropolitano, temos a presentación do libro "A Terra do Eo-Navia. A galeguidade en Asturias" de Manuel Miragaia Doldán, publicado pola Medulia Editorial.

Acceso libre até completar capacidade.

Resumo:

Queremos con este libro mellorar o coñecemento desta querida, fermosa e secular terra asturiana do Eo-Navia, un territorio que conta cunha riquísima cultura, variadas tradicións e un considerábel patrimonio material e inmaterial, sendo para destacar especialmente deste último a súa fala ou variante lingüística comarcal da grande lingua galego-portuguesa, e que é merecedora da máxima protección e desenvolvemento.

Para a elaboración deste libro contamos cunha ampla bibliografía, con informacións obtidas de moitas outras fontes e coas experiencias vividas nas viaxes e estadías feitas ao longo dos anos. Cremos que neste conxunto se reúnen informacións e datos xeográficos, históricos, lingüísticos, culturais, patrimoniais, etnográficos, socioeconómicos, gastronómicos e dos seus grandes homes e mulleres que poden contribuír a que os eonaviegos coñezan mellor e valoren máis a súa Terra mesopotámica e a que os galegos viaxen e se relacionanen máis con ela.

Ofrecemos tamén, como complemento e ilustración do texto, unha ampla e significativa selección de fotografías sobre a Comarca do Eo-Navia.

Biografía:

Manuel Miragaia Doldán naceu na cidade da Coruña. Licenciado en Filosofía pola Universidade de Santiago de Compostela, exerceu como profesor de Filosofía no ensino público. Ao longo da súa traxectoria profesional, realizou traballos de investigación e de innovación educativa, ademais de dar cursos e actuar como conferencista. A súa paixón pola poesía tamén o levou a participar en múltiples recitais, onde presentou as súas propias composicións.

Na súa faceta literaria, Miragaia Doldán é autor de varios libros, entre os que se inclúen Xénese e Apocalipse (poesía), Manual para escritores e outras sátiras (narrativa), Galeguia (poesía) e O sentido do infinito (poesía). Tamén se destacou na vertente do ensaio, co traballo A realidade portuguesa no pensamento galeguista. Ademais, desde mozo, foi un prolífico articulista, publicando máis de mil artigos en diversos xornais e revistas, todos eles en galego, facendo gala do seu compromiso coa lingua e a cultura galegas.