Esta charla/conversa tentará afondar nos vencellos entre a disciplina da educación e a disciplina da literatura dende unha dupla perspectiva. Por unha banda, a da educación literaria: que entendemos cando falamos desta, cando deixamos de aprender dende unha perspectiva literaria ou que podemos agardar na idade infantil e na adulta. Pola outra, abordaremos tamén en como reflicten a educación algunhas obras literarias contemporáneas, tanto pensadas para público infantil e xuvenil como para público adulto. Neste último caso, a idea é facer reflexionar á espectadora e ao espectador sobre como a ficción describe habitualmente o sistema educativo, mais tamén fornecer unha serie de obras que lle permitan, como lectora, como lector, seguir afondando neste tema.

Montse Pena Presas, doutora en Filoloxía pola Universidade de Santiago, actualmente é profesora de Didáctica da Lingua e da Literatura na mesma universidade. Ten publicado diversos traballos de investigación e ensaios divulgativos, sobre todo centrados na literatura infantil, na educación literaria e nos estudos de xénero, os seus ámbitos de especialización. Académica correspondente da RAG, compaxina a súa labor docente e investigadora coa crítica literaria en diversos medios.

Será todo un luxo contar con ela na Biblioteca. Esperámosvos!