As Bibliotecas Municipais da Coruña seguimos rompendo regras tamén dende os nosos espazos físicos. En outubro, coincidindo co Día Internacional da Morte Perinatal (156 de outubro)e o Día Internacional da Menopausa (18 de outubro), a Biblioteca Municipal Durán Loriga acolle un ciclo de actividades arredor de diferentes etapas e realidades na vida das mulleres: a menopausa e o duelo perinatal.

Este ciclo forma parte do centro de interese " Rompendo regras ", presente tamén nas bibliotecas de Biblioteca Municipal Monte Alto e Biblioteca Municipal Os Rosales : unha selección de fondos sobre saúde menstrual, economía e educación menstrual, dereitos menstruais, menopausa, activismo e arte, inspirada no Laboratorio de Participación Cidadá pola Menstruación Digna e Ecosaudable do Grupo de Igualdade da Facultade de Ciencias da Educación da UDC, co que colaboramos dende hai anos.

Porque acceder á información é tamén unha forma de coidarse, e as bibliotecas públicas somos un espazo onde atopar recursos fiables para mellorar o benestar e a saúde das persoas e das súas familias.

Actividades destacadas:

• Faladoiro: A vida sen regras, e agora que? Martes 21 e 28 de outubro. Primeiro grupo de conversa arredor da menopausa, dinamizado por Lorena Fagil, creadora do Círculo Bla, e coa psicóloga Uxía Domínguez.Un espazo seguro de conversa e acompañamento para compartir experiencias, sentimentos e ferramentas sobre esta etapa da vida das mulleres: como nos sentimos, que cambia, como coidarnos e como crear redes de apoio.
• Curtametraxe e coloquio: Nais de luz Venres 31 de outubro. Proxección da curta documental Madres de Luz (2023) na Filmoteca de Galicia, seguida dun coloquio na biblioteca coa participación de Rocío Océano, unha das protagonistas. A curta aborda o duelo perinatal a través da voz de tres nais que atravesaron esta experiencia, visibilizando unha realidade que segue a ser invisible para moitas persoas.

Mostra bibliográfica "Rompendo Regras"

Durante todo o mes de outubroSelección de libros e recursos para acompañar as temáticas do ciclo: saúde menstrual, menopausa, maternidades, corpo e coidados.