Dentro do ciclo Rompendo Regras, na Biblioteca Municipal Durán Loriga contaremos co primeiro grupo de conversa, dinamizado por Lorena Fagil, creadora do Círculo Bla, e co acompañamento da psicóloga Uxía Domínguez.

Estes encontros nacen do desexo de xerar espazos seguros de conversa, escoita e acompañamento. Nun mundo cada vez máis rápido e desconectado cremos que é fundamental crear momentos onde poidamos simplemente estar, compartir e sentirnos acompañadas.Un grupo de conversa arredor dun tema que nos preocupa e que queremos visibilizar.

A menopausa chega á vida de moitas mulleres, de formas diferentes. Aquí falaremos do que supón, do que pode transformar a vida das que pasan ou pasaron por esta etapa. Como nos sentimos, que cambios se experimentan, como coidarnos, como crear redes de apoio...

Se isto é o que necesitas, só tes que inscribirte nas dúas sesións de outubro.

Esperámoste!

En todas as nosas bibliotecas temos a disposición da cidadanía libros informativos sobre hixiene e saúde menstrual. Nas  Biblioteca Municipal Durán Loriga , Biblioteca Municipal Monte Alto  e Biblioteca Municipal Os Rosales temos, ademais, a sección Rompendo regras , un centro de interese que toma o seu nome do Laboratorio de Participación cidadá en prol dunha menstruación digna e ecosaudable, do Grupo de Igualdade da Facultade de Ciencias da Educación da UDC.

Podes pasar por calquera destas bibliotecas para descubrir os fondos que recollen e levalos en préstamo.