Con motivo do Día das Letras Galegas 2026, a Biblioteca Ágora acolle Memoria viva e letra escrita, un encontro arredor da figura de Begoña Caamaño, escritora, xornalista e activista cultural homenaxeada este ano pola Real Academia Galega.

A actividade está especialmente dirixida aos Clubs de lectura e ás persoas interesadas na literatura galega contemporánea, co obxectivo de achegarse á obra e ao pensamento dunha autora fundamental para entender a creación literaria e o feminismo galego das últimas décadas.

O encontro abordará non só a súa produción literaria, senón tamén o seu compromiso público e o seu papel como voz crítica no ámbito xornalístico, cultural e social.

Na mesa redonda participarán:

• Beatriz Maceda, autora de Begoña ou o pracer da amizade
• Marga Do Val, poeta, crítica literaria e amiga persoal de Begoña Caamaño

A conversa permitirá descubrir novas lecturas da súa obra e coñecer máis de preto a dimensión humana e intelectual dunha autora que deixou unha fonda pegada na cultura galega contemporánea.