Para festexar o Día das Letras Galegas e no marco da campaña #Desordenatecoasletras, organizamos un encontro transfronteirizo coa Biblioteca Lucio Craveiro de Braga para dar a coñecer a unha das autoras máis innovadoras do discurso poético actual e tamén homenaxeada este 2021, Xela Arias.

A íntima relación de Xela con Portugal, recibindo a Medalla "Premio de Traduçao Sociedade de Lingua Portuguesa" por Amor de perdición de Camilo Castelo Branco, así como a amizade co poeta madeirense José Viale Moutinho,  Premio aRi[t]mar especial do xurado 2021 por "Embaixada da Amizade galego-lusófona", fan deste encontro unha oportunidade para afondar na figura e na obra de Xela a través dos lazos co país veciño.

O encontro será virtual e terá lugar o vindeiro día 25 coa participación de Chus Nogueira, Dúas gamberras e un micro, Tiago Alves Costa e Hugo Milhanas Machado sendo moderado por Raúl Costas Pereira, do Centro de Estudos Galegos da Universidade de Minho.

Sobre as persoas participantes

• Chus Nogueira é unha filóloga e ensaísta galega. Doutora en Filoloxía Galega pola Universidade de Santiago de Compostela, docente de literatura na Facultade de Filoloxía e editora de Xela Arias. Tamén é a presidenta da Asociación Galega da Crítica desde a súa creación en 2015.
• Dúas gamberras e un micro é o proxecto de poesía oral e intervención escénica  formado polas viguesas Nuria Vil (Santo André de Comesaña, 1993) e Vanessa Glemsel (Castrelos, 1987).

Acceso ao encontro

O encontro desenvolverase a través da plataforma Zoom. Podes acceder co programa instalado ou desde calquera navegador, en ambos casos premendo neste enlace https://zoom.us/j/95560198785.