María Casares foi sempre plenamente consciente da súa condición de exiliada. A súa vinculación e a súa responsabilidade co mundo do exilio (en Francia primeiro e na Arxentina anos despois) definen a súa figura e a súa personalidade. Non é posible coñecer e entender a María Casares sen abordar este importante aspecto da súa vida. A través deste faladoiro pretendemos concienciar do que o exilio supón na vida dunha persoa e na propia comunidade, tanto a de orixe como a de acollida. Facémolo coa intervención dunha persoa que o viviu en carne propia, desde a óptica da acollida e do acollemento, e cunha especialista na temática do exilio que nos dará unha breve perspectiva do que esta migración forzada supuxo -e supón- para España e para Galicia.

Participarán Montserrat Golías, profesora de Socioloxía  e CC. da Comunicación na UDC, e Ahmad Matar, refuxiado sirio que traballa no campo da cooperación.