Unha homenaxe a Carmen Martín Gaite

En 2025 cúmprense cen anos do nacemento de Carmen Martín Gaite (1925-2000), unha das voces máis singulares e renovadoras da literatura española do século XX. Co ciclo "Mentres dure a vida, sigamos co conto", a Biblioteca Fórum Metropolitano súmase ás celebracións do seu centenario, ofrecendo un espazo de encontro co seu legado.

Martín Gaite foi unha autora poliédrica que transitou con mestría por diversos xéneros -da narrativa ao ensaio, pasando pola poesía ou o guión- sempre cunha ollada crítica e profundamente humana. Nos seus textos explorou cuestións universais como a identidade, a incomunicación ou a procura de sentido, cunha perspectiva feminina que abriu camiños para moitas lectoras e lectores.

"Para ela, todo era un conto que tiña que estar ben contado: as lecturas, o amor, a vida propia e allea, os soños, a historia".- José Teruel

A Xeración dos 50 en feminino

Xunto a Martín Gaite, outras autoras da chamada "Xeración dos 50" -como Ana María Matute, Mercedes Formica, Gloria Fuertes ou Rosa Chacel- contribuíron a enriquecer a literatura española da posguerra con voces valentes e innovadoras. Este ciclo tamén quere visibilizar a súa pegada e o papel decisivo que tiveron na narrativa e na poesía da segunda metade do século XX.