Tras dúas edicións dedicadas ao surf e o submarinismo, este ano o Festival pon a súa atención na vela. Un deporte para todos que se desprende da súa imaxe elitista e que nos mostra os grandes valores que fomenta: traballo en equipo, solidariedade e afán de superación, entre outros. Ademais, os tripulantes de veleiro son xente comprometida co mar e saben de primeira man da importancia da preservación.

Se nunca subiches a un barco de vela, este ano Mar de Mares poncho fácil. E divertido. En colaboración co Real Club Náutico da Coruña, terás a posibilidade de converter un bautismo de vela nunha trepidante experiencia; unha regata pola baía da Coruña. Na actividade poderá participar calquera persoa maior de 8 anos que saiba nadar, sen necesidade de experiencia previa en navegación. Podes vir en familia, con amigos ou só. O bautismo comeza cunha primeira toma de contacto co barco, onde un patrón nos iniciará nas nocións básicas da navegación a vela a bordo dun 550 con capacidade para 5 tripulantes para despois competir na regata que se desenvolverá na baía coruñesa. Cada participante recibirá un diploma acreditativo do bautismo e a tripulación gañadora terá premio. Vento en popa a toda vela, e que gañe o mellor!

E se dispós de barco propio e che apetece participar na regata, non tes máis que sumarte para apoiar este deporte e celebrar e defender os mares co Festival e co RCNC. Envíanos un correo electrónico a info@festivalmardemares.org confirmando a túa asistencia.

*A realización desta actividade está suxeita a condicións meteorolóxicas e a acadar o mínimo de persoas inscritas (15). En caso de cancelación devolverase o importe íntegro e notificarase con suficiente antelación.

+ info