O mércores 8 de febreiro ás 18:30 h. temos na Biblioteca Fórum este obradoiro, dirixido á mocidade e público adulto, impartido por María Teresa Piñeiro Otero profesora titular de universidade na área de Comunicación audiovisual e publicidade da Universidade da Coruña e Laura Milagros Castro, Souto profesora titular de universidade na área de Ciencia da computación e intelixencia artificial.

Cada vez o mundo dixital gaña máis terreo no noso día a día, teléfonos móbiles e reloxos intelixentes, tabletas, portátiles, que nos acompañan a todas partes. Accedemos inmediatamente a un sinfín de información...pero é toda a información valiosa? sabemos distinguir atopar a agulla dentro da palleira? sabe o noso alumnado distinguir a información veraz da falsa? Aquí é cando entra en xogo o concepto de "educación mediática".

Sesión de convivencia entre nen@s e maiores nas que falaremos, debateremos e mostraremos o uso dos diferentes medios de comunicación empregados polas distintas xeracións de persoas, cun enfoque crítico e o obxectivo de ampliar horizontes tanto duns como de outras.

Cunha parte expositiva comezaremos polo principio: prensa, radio e televisión (características, usos e espazos). Falaremos por suposto da revolución de Internet e de como os medios de comunicación fixeron a procura do seu lugar nun mundo no que nos atopamos con infinidade de novos formatos e plataformas. 

Nunha segunda parte máis práctica e explorativa abordaremos o papel que deben xogar os usuarios para converterse en algo máis ca meros espectadores, daremos tips e boas prácticas sobre o papel das usuarias na selección e produción de contidos. Por suposto terán cabida tamén as redes sociais. Abordaremos dende o Facebook ao TikTok, as principais plataformas e usos e dos principais perigos e problemáticas á hora de informarnos nas redes.